Отворен повик за предметни наставници од областа на природните науки

Програма за влијание на заедницата на Џонсон Мети „Науката и јас“

Отворен повик за предметни наставници од областа на природните науки: Еднодневна тренинг работилница за ефективна настава по природни науки

Повикот е отворен до 15.10.2026 година

Дали сте наставник по природни науки, биологија, хемија или физика на почетокот на Вашата професионална кариера? Дали сакате да внесете повеќе експерименти, истражување, практична работа и љубопитност во Вашата училница?

Македонија2025, во соработка со Џонсон Мети, отвора нов повик во рамки на програмата „Науката и јас“, наменет за предметни наставници од основните училишта во Македонија кои сакаат да ги унапредат своите компетенции за современа и инспиративна настава по природни науки.

Програмата не е само обука. Таа ги поврзува професионалниот развој на наставниците, практичната примена на наученото во училницата, менторската поддршка и активното вклучување на учениците во експерименти и научни активности.

За проектот

Целта на проектот е да ги зајакне компетенциите на наставниците по природните науки во руралните и урбаните основни училишта во Македонија, преку нови вештини и техники кои ќе го поттикнат интересот и амбицијата на учениците да ја засакаат науката и да ја замислат како своја идна професионална насока. Наставниците ќе добијат идеи и практични насоки за унапредување на наставата, а заедно со своите ученици ќе имаат можност да изработуваат и презентираат експерименти на посебно организирани саеми по наука.

Ова е четвртото издание на проектот „Науката и јас“. Во досегашните изданија проектот вклучи 109 наставници, над 35 ментори и илјадници ученици од училишта низ Македонија, а преку 10-те регионални саеми по наука учениците имаа можност своите експерименти и проекти да ги претстават пред повеќе од 2600 врсници, наставници и пошироката заедница.

За обуката

Во рамки на проектот ќе се организира еднодневна практична обука, наменета првенствено за 20-30 наставници кои се на почетокот на својата професионална кариера. Обуката ќе се реализира во соработка со Бирото за развој на образованието и ќе биде насочена кон методи што можат директно да се применат во училницата: учење базирано на истражување, практични експерименти, проектно учење, поттикнување критичко размислување и активно вклучување на учениците во процесот на учење.

Што добивате со учеството?

• едукативна сесија спроведувана од страна на обучувачи од Бирото за развој на образованието и други образовни институции;

• практични стратегии и методи за унапредување на наставата по природни науки;

• дидактички материјал за наставници за ефективна настава по природни науки, на македонски јазик и албански јазик;

• сертификат за професионален развој, како поддршка за Вашиот понатамошен напредок во кариерата;

• можност дел од наставниците да развијат и да прикажат свои експерименти и проекти, спроведени со група свои ученици, на 1-2 регионални саеми по наука;  

• можност дел од наставниците самостојно да организираат активност/настан во рамки на своето училиште и да презентираат експерименти и проекти реализирани со група ученици од 6. до 9. одделение;

• поддршка од наставници-ментори по предмети од областа на природните науки;

• можност за добивање сет за наука со материјали и опрема за реализација на практични експерименти и активности со учениците, по завршувањето на обуката; сетовите ќе бидат доделени на дел или на сите учесници, во зависност од нивната ангажираност и вклученост во активностите предвидени по обуката;

• можност за посета на фабриката Џонсон Мети во близина на Скопје, водечка компанија посветена на иновации и технолошки развој, со глобално влијание во области како што се транспортот со ниски емисии, енергијата, хемиската обработка и ефикасното користење на природните ресурси (за ограничен број наставници, со група од 3 до 5 ученици);

• мерење на влијанието на обуката врз самодовербата и мотивацијата на наставниците преку истражување/анкета од мал обем, засновано на прашалник за самоевалуација, со споредба на состојбата пред интервенцијата (пред обуката) и по интервенцијата (по обуката или завршувањето на програмата).

Општи услови за учесниците на обуката

Право да конкурираат:

• Предметни наставници приправници од основните училишта кои реализираат настава по предметите: природни науки, биологија, хемија или физика;

• Предметни наставници од основните училишта кои реализираат настава по предметите: природни науки, биологија, хемија или физика со работно искуство во настава не подолго од 10 години.

*Напомена: Со цел да им се овозможи простор на нови учесници, наставниците кои веќе биле дел од обуките во рамки на претходните изданија на проектот не се целна група за овој повик.

Како да аплицирате?

1. Апликацијата се поднесува преку електронската ФОРМА ЗА АПЛИЦИРАЊЕ.

Покрај основните податоци за Вас и училиштето во кое работите, потребно е да доставите:

• ваша биографија (CV) која го прикажува вашето образование, искуството во наставата и претходно посетените обуки и другите професионални активности;

• кратко мотивационо писмо (максимум 500 зборови) објаснувајќи зошто сте заинтересирани да учествувате на оваа работилница;

Документите се доставуваат на македонски јазик.

Сите документи се прикачуваат на укажаната ФОРМА. 

2. Задолжително пополнете го ПРАШАЛНИКОТ ЗА САМОЕВАЛУАЦИЈА преку кој го мериме влијанието на обуката кон подобрената самодоверба и мотивација на наставниците.

3. Рок за аплицирање: најдоцна до 15.10.2026 година.

Селекција

По завршувањето на повикот ќе биде направен избор на учесници кои ги исполнуваат условите.

При селекцијата ќе се земат предвид мотивацијата за учество, можноста за практична примена на стекнатото знаење, како и регионалната, родовата и етничката застапеност на учесниците. Процесот на селекција ќе даде приоритет на прв пријавен - прв примен учесник/учесничка.

Сите кандидати ќе бидат известени за резултатите од селекцијата најдоцна до почетокот на ноември 2026 година.

Важни датуми

Краен рок за аплицирање: 15 октомври 2026 година

Обука: ноември 2026 година

Практична работа и активности со учениците: во текот на учебната 2026/2027 година

Научни саеми и презентација на експерименти: март - мај 2027 година

За дополнителни информации и прашања за самиот повик користете ја електронската адреса: ScienceAndMe@macedonia2025.com .

Науката започнува со љубопитност. Инспирацијата започнува со добар наставник.

Пријавете се и станете дел од заедницата на наставници „Науката и јас“ - заедница која ја носи науката поблиску до учениците и ја претвора училницата во место за истражување, откривање и создавање.